Trefnu cynllun talu
Mae cynllun talu yn eich galluogi i dalu’ch taliadau treth fesul rhandaliad dros gyfnod o amser.
Mae eich cynllun yn cwmpasu’r dreth sydd arnoch ac, os yw’n berthnasol, y ddau daliad ymlaen llaw tuag at eich bil treth. Mae’r cynllun hefyd yn cwmpasu unrhyw gosbau neu daliadau yn erbyn eich cyfrif. Bydd yn rhaid i chi dalu llog ar y swm a dalwch yn hwyr.
I fod yn gymwys i sefydlu cynllun talu ar-lein, mae’n rhaid i’r canlynol fod yn wir amdanoch:
- mae’n rhaid i chi sicrhau bod eich Ffurflenni Treth yn gyfredol
- mae arnoch £30,000 neu lai
- nid oes gennych unrhyw ddyledion treth eraill
- nid ydych wedi sefydlu cynlluniau talu eraill gyda CThEF
Gallwch ddefnyddio’r gwasanaeth hwn cyn pen 60 diwrnod i’r dyddiad cau ar gyfer talu.
Talwch nawr er mwyn talu llai o log neu ddim llog o gwbl
Bydd yn rhaid i chi dalu llog ar unrhyw daliadau a wneir ar ôl y dyddiad cau.
Talwch eich bil yn llawn er mwyn osgoi llog neu dalu llai ohono.
Cyn i chi ddechrau
Bwriad CThEF yw y bydd hwn yn gynllun talu un-tro er mwyn rhoi cymorth ychwanegol i chi. Mae’n rhaid i chi sicrhau eich bod yn gwneud eich taliadau mewn pryd. Os na fyddwch, mae’n bosibl y bydd CThEF yn gofyn i chi dalu’r swm cyfan sy’n weddill.
Er mwyn sefydlu’r cynllun talu, bydd angen i chi wybod beth yw’ch incwm a’ch gwariant misol, ac unrhyw gynilion neu fuddsoddiadau.